/public/article/images/202405/2545f40a-f563-43e9-871c-af0b6477e68c.jpeg)
黎芷珊主持嘅節目《芷珊約您》喺（12日）播出第四集，嘉賓係打入國際巨星王嘉爾（Jackson），一位前港隊劍擊運動員，隻身到韓國當練習生、以男團GOT7出道，再單飛發展、粉絲遍佈全球的歌手。芷珊除了直擊其首個巡唱中國區第一站澳門演出，仲同Jackson進行深度專訪，除咗探討萬人迷嘅內心世界，就連Jackson嘅爸爸都罕有訪談同兒子相處。
王嘉爾（Jackson）世界巡迴演唱會澳門站，芷珊送鹹竹蜂畀 Jackson 騷前開聲飲。
不少人將人生重要事情以紋身記錄下來，Jackson身上有不少別具意義嘅紋身，佢同芷珊分享其中手臂上嘅《西遊記》剪影紋身，背後故事原來與其演藝事業有關：「媽媽係上海人，每年暑假會返上海，打開電視百分之八十以上都播緊《西遊記》，對我成長好大影響。而我做藝人、歌手，做作品分享畀更多人睇，呢個journey其實都係to the west（往西方世界進發）。」
王嘉爾覺得自己嘅演藝事業似《西遊記》，旅途一樣係往西方世界發展。
現年30歲嘅Jackson有樣有才華，風靡萬千少女，不過感情仍未有著落，佢坦承渴望談戀愛，不但希望35歲前成家立室，更盼望早日成為爸爸，可以同子女建立朋友般嘅關係：「我想見佢哋耐啲，想同佢哋成為朋友，一齊去飲酒、跑步、打波。」Jackson對感情事從不強求，一切順其自然，但人漸成長卻令佢變得內向，甚至出現社恐：「本身好active、好開朗，同人好快做到朋友，但時間耐咗，覺得自己有少少冇咁想社交。我以為係好friend嘅、真心嘅，但最尾好多時唔係咁。」
Jackson 恨拍拖，希望 35 歲前成家立室，同子女關係似朋友。
芷珊問到想跟10年嘅自己說甚麼，Jackson笑言：「冇咩要講，叫佢好自為自！我覺得唔會再喺呢個圈度，呢個係我嘅選擇、我嘅人生，我想生活、我想創作，我覺得我嘅強項係創作，而唔係淨係幕前。」嚇到芷珊都話你嘅歌迷聽完一定會喊。
芷珊承認 VVIP 十指緊扣環節係「自肥」！
今集Jackson大膽反要求芷珊分享小秘密「回禮」，芷珊話同Jackson十指緊扣零距離體驗，其實係「自肥」項目：「開頭係（製作組）一個設計，但其實呢件事係我一直以來嘅心願。」芷珊對Jackson讚不絕口，不但大讚對方係不節不扣嘅細心暖男，人氣紅透半邊天依然謙卑踏實，全程素顏受訪更無半點偶像包袱：「佢想用最真實、最舒服狀態同我傾偈。」、「雖然擁有千千萬萬個fans，但畀我感覺仍然好踏實、冇飄（囂張）嘅感覺，總括嚟講，越認識王嘉爾個人，係會越鍾意佢。」
Jackson仲話 10 年後應該會轉型幕後，唔再活躍幕前。
Jackson 與父母
完成拍攝後，Jackson 同大家合照留影。
《芷珊約您》逢星期日晚上9點半翡翠台播映
