林嘉欣拍片籲大眾關注肥胖症 惋惜高中好友因肥胖症早逝

林嘉欣早前為呼籲大眾提高對肥胖症認知關注而拍攝宣傳片，喺廣告入面，佢嘅對手係白雪雪、肥嘟嘟，但確診咗肥胖症嘅「表弟」。由於「表弟」係以CG動畫製作，所以拍攝當日，導演安排真人換上1比1服飾，神還原「表弟」同嘉欣對戲。嘉欣喺宣傳片中一直陪伴「表弟」面對肥胖症，又換上運動服同對方一齊跑步，更會攬實佢以示支持。
 
林嘉欣早前為呼籲大眾提高對肥胖症認知關注而拍攝宣傳片。

其實呢次廣告拍攝真係好事多磨，嘉欣透露早前受天氣影響，拍攝三度改期。嘉欣話：「本身月頭就要拍，但遇到好多天氣唔理想，改咗幾次拍攝日期。因為我哋要喺室外做好多運動，我又唔想『表弟』凍親，所以今日趁好陽光就拍。」而因為宣傳片喺西環海旁取景，經常有飛機同船隻經過，團隊多次因收音問題需要暫停拍攝。不過嘉欣就覺得，只要一切拍出嚟靚，所有嘢都值得。
 
其實呢次廣告拍攝真係好事多磨，嘉欣透露早前受天氣影響，拍攝三度改期。

而嘉欣喺拍攝期間亦諗起讀書時期一位患有肥胖症嘅好友，佢話「佢屋企三兄弟姊妹得佢有肥胖症，十幾歲已經200幾磅，個個月都要去磅重。佢坐我隔離，會成日問我有冇散紙，我有就畀佢。但原來佢屋企人唔會畀錢佢，因為驚佢買零食，仲會自製飯盒畀佢。後來我發現好似好心做壞事，之後佢每次問我，我都會話『唔好意思，我冇散紙呀』。」
 
嘉欣喺拍攝期間亦諗起讀書時期一位患有肥胖症嘅好友。

後來嘉欣出席舊生聚會時，從校長口中得知對方離世嘅消息：「校長同我講佢過咗21歲生日就走咗，因為肥胖症引起咗好多身體嘅狀況，Heart Condition唔好，知道咗之後好心痛。」嘉欣仲透露對方唱歌很好聽，對於好友離世感到非常惋惜，亦呼籲肥胖症患者及早諮詢專業人士意見。
 
嘉欣仲透露對方唱歌很好聽，對於好友離世感到非常惋惜，亦呼籲肥胖症患者及早諮詢專業人士意見。

至於講到今年工作大計，嘉欣表示：「會不停飛，好開心會有好多新嘅合作夥伴。6月8號至30號會喺位於台北嘅純Object藝術空間舉辦我首個陶藝展『Broken Beautiful』，會由香港帶31件花器創作到當地展出。今次我要做比較大嘅器皿，練習時都不停失敗。呢個係一個新挑戰，從中學習，今年年尾就會拍戲。」