家族榮耀之繼承者丨廝殺！林峯阻羅子溢畏罪潛逃起飛腳 黃浩然為救佘詩曼硬撼大貨車

《家族榮耀之繼承者》星期五晚迎嚟大結局，今晚播出呢集講黑化智斌（羅子溢飾）被發現殺父證據，智斌帶細媽家碧（張鳳妮飾）同馬曉靈（王敏奕飾）畏罪潛逃時，遇上高浚（林峯飾）同皓兒（佘詩曼飾），高浚同智斌更上演廝殺戲份。

阿峯拍攝完人氣武打電影，身手真係更勝當年，阿峯先使出寸勁﹐再一腳踢落子溢個肚度，隔住個鏡頭都感受到澎湃力度，好在子溢有深厚嘅腹肌頂住，否則阿峯收到羅太楊茜堯電話啦！

Rio（黃浩然飾）亦上演一場被大貨車撞嘅戲份，雖然有替身幫助，但係浩然要補拍頭撞大貨車嘅大特寫，拍攝經歷豐富嘅浩然拍得輕鬆，反而身後要做反應嘅拍檔相當困難，拍攝目擊浩然被撞戲份嘅阿峯、張鳳妮同王敏奕七情上面，反而鏡頭外嘅浩然刻意搞笑，令阿峯忍唔住笑要NG。