家族榮耀之繼承者｜羅子溢黑化弑父撈家怒摑忤逆仔 大細媽爆喊各有唔同情緒

熱播中嘅《家族榮耀之繼承者》進入結局倒數階段，由羅子溢飾演嘅智斌被發現非丘家長子後亦徹底黑化，而守義(羅嘉良飾演)亦意外得知智斌係高成(吳岱融飾)之子。守義狠心改遺囑，最終被智斌發現，智斌同時以發現高成之死同守義有關來要脅對方，令守義惱羞成怒狂摑「仵逆仔」，劇中兩人扭打途中守義亦被水晶球擊中死亡。

其實呢場咁精彩嘅扭打戲份進行分段拍攝，為求逼真撈家拍掌摑戲時一啲都冇留力，真係打到啪啪聲，連工作人員都即時詢問子溢有冇事。但專業嘅撈家只係拍了兩Take就過關，打完後撈家非常滿意拍手鼓勵大家，大讚呢場戲好有張力。

同集守義嘅兩位太太亦演技大爆發，由余安安飾演嘅戴綺婷同埋張鳳妮飾演嘅邵家碧得知劇中丈夫死訊時痛哭展現唔同情緒，喺警方去到丘家調查嘅時候，大細媽嘅喊法完全大不同，大媽喊得誇張而不斷講出大話證供，而細媽亦喊得心中有鬼，花絮中展示安安姐同鳳梨獨個兒補拍特寫鏡頭時嘅演技，安安姐因為忍唔住自己誇張嘅演出喺尾段破口大笑，而鳳梨從頭到尾都展示有隱情嘅複雜心情。