佘詩曼透露媽咪健康樂觀 透露《新聞女王2》題材談社會現象

佘詩曼主演嘅神劇《新聞女王》即將開拍續集同電影版，呢日阿佘出席活動時都證實已經收到呢個好消息，佢話早幾個月前已經同監製傾過，略略知道兩個故事大概係點，而故事當中討論嘅議題，阿佘覺得好值得大家反醒嘅社會現象，係好好嘅題材。至於開拍時間，阿佘指總監製鍾澍佳就留住咗佢明年一月檔期，但就唔知會否提前，亦有可能續集同電影版一齊拍，方便夾到啲景。

阿佘早前同幾幾位好姊妹去布吉嚟個大解放，個個都泳裝性感出擊，阿佘話呢個係 Toby梁靖琪 嘅提議，因為難得一齊去旅行，不如影輯相留念，於是鎖定咗兩種顏色，然後各自搵衫，去到布吉就攤晒啲衫出嚟互相揀，阿佘話自己套黑色魚網衫係Toby嘅。問到係咪去外地先敢着比堅尼？佢話：「去到適當嘅地方着適當嘅衫係啱嘅。」佢又指因為冇步出過間屋，所以冇男士嚟搭訕。

阿佘媽咪近年身體抱恙，而家正於抗病之中，阿佘就透露媽咪健康情況樂觀，所以下半年唔使開劇嘅時候，佢都會爭取時間陪媽咪，有時外出工作有幾日空檔，都會返嚟陪媽咪。提到《家族榮耀之繼承者》大結局最後一幕林峯現身阿佘嘅婚禮，阿佘話監製想去營造一個空間畀觀眾去思考。