高海寧拍打戲常受傷自封「豆腐Ling」 透露《新聞女王2》許詩晴驚喜有發展

高海寧（高Ling）憑劇集《新聞女王》喺內地人氣急升，所到之處都吸引大批粉絲支持。高Ling現身自己嘅出生地南京出席活動，雖然十幾歲時已移居香港，但對南京嘅生活依然記憶猶新，不過有啲地方兒時經常去玩嘅地方，已經改變好大，甚至佢當年所住嘅地方都拆咗，所以有種既熟識又陌生嘅感覺。

早前曾公布《新聞女王2》將加入新血，高Ling都好期待收到劇本，佢都話成日追問總監製鍾澍佳，究竟許詩晴呢個角色喺感情同事業上發展係點，得到回覆係唔使心急，一定有驚喜。

啱啱拍完新劇《武林》嘅高Ling，笑指喺劇中不時有打戲，所以自己又回復「豆腐Ling」狀態，經常受傷。稍後會喺經典電影中客串演出，但未能夠透露詳情，但非常期待同男神合作。