獨家丨Hello Hong Kong丨無綫與內地各大平台未來連串合作 小生花旦撐場 新聞女王拍電影版

TVB今日（25號）喺上海舉行一個名為《Hello Hong Kong》大型盛事，電視廣播有限公司行政主席許濤率領一眾高層同小生花旦，一齊出席盛大發布會《Hello Hong Kong．你好TVB》，宣布TVB同內地各大平台未來一連串合作計劃，盛會更獲得香港特別行政區政府政務司司長陳國基、上海市委統戰部王珏副部長等一眾官員，以及內地各大不同類型平台代表現身當中。

行政主席許濤致詞感謝各界支持，並指TVB作為香港最悠久嘅電視廣播機構，多年嚟都保持百分之八十嘅電視收視市場份額，源於TVB對於港式劇集、綜藝、新聞以及資訊節目內容嘅深耕細作，將香港定位為中外文化藝術交流中心，係公司嘅發展機遇。中央政府同香港特區政府對促進兩地文化融合嘅支持，係公司發展嘅信心。

總經理（節目內容營運）曾志偉表示近幾年跟內地平台一齊合作，一齊帶動所有文化、綜藝節目以及劇集走進去帶出去，這一切都要感激陳國基司長，因為香港特區政府一直非常支持TVB，令公司走得更前，同時又促成跟好多唔同平台合作，先可以令公司走到現在。

過去TVB跟多間內地電視機構、網絡平台合作，喺5年內打造過百部優質作品。未來TVB喺劇集、綜藝、新聞資訊節目等各方面，繼續同內地各平台保持高密度合作。喺劇集方面，TVB會同內地平台合作推出八部重頭劇，包括同優酷合作嘅《法證先鋒VI倖存者的救贖》、《黑色月光》、《巨塔之后》同埋《新聞女王2》，仲有同騰訊合作推出嘅《反黑英雄》、《企業強人》、《巾幗梟雄之懸崖》及《刑偵12》。

活動上亦宣布好消息，《新聞女王2》會喺年尾開拍之外，同時亦會開拍電影版，《新聞女王》總監製鍾澍佳話度第二季劇情時候，發覺成個故仔好似少咗一塊拼圖，所以就諗到想做埋電影版。問到馬國明想電影版飾演同劇中一樣角色，定係另一個全新角色？馬國明就話唔知道，但就好期待睇。高海寧就話聽聞過電影版會開拍先，喺電影版有得留低嘅人先可以喺《新聞女王2》出現，所以令一眾演員好緊張自己嘅存在。

相隔多年回巢拍攝《刑偵12》嘅林保怡，就指劇本考佢演技同身手，因為由頭到尾不停打，而重點係被人打。同樣亦係多年後，再回巢接拍《黑色月光》嘅楊茜堯，以復仇女王回歸，佢都話係第一次演一個復仇感咁重嘅角色充滿挑戰，仲話若果同胡定欣聯手對付黎耀祥應該仲好睇。