賴彥妤公主look為新書影靚相 自資六位數出書分享心靈雞湯兼做慈善

娛樂新聞台主播Vivienna賴彥妤即將於書展推出新書，日前佢特別以一身公主造型現身影樓為新書影靚相，順便同大家介紹本新作內容。原來Vivienna新書收錄一啲身心靈語錄同靚相，點解會有咁嘅諗法。

Vivienna原來同疫情有關，呢幾年有好多負能量充斥，自己喺呢段期間學咗啲有關身心靈嘅課程，所以佢想做一啲生命影響生命嘅嘢。Vivienna唔只自資6位數出書，仲以義賣新書形式做慈善，果然係人靚心善嘅代表。

Vivienna喺書中嘅靚相呈現百變形象，包括有英倫風校服look、以及典雅高貴嘅晚裝等，全部同佢本身過往經歷有關，除咗有唔同造型，佢仲會展現大幅度情緒變換，例如有晒大笑同大喊嘅相，所以拍攝過程都係一個大挑戰。

既然出書講心靈療癒，Vivienna亦有同大家分享自己嘅經驗：「我自己其實係一個開心果，經常會喺朋友當中搞吓爛gag，有時朋友唔開心，我就會變成樹洞，而我自己都好樂意成為大家傾訴嘅對象。」至於自己嘅紓壓方法，Vivienna就話如果遇到唔開心嘅事，就會搵第二啲令自己開心嘅嘢去做，例如飲杯珍珠奶茶，就足以令自己開心。