覓七人座駕非為再添新成員 陳凱琳分享選美貼士

陳凱琳現身汽車品牌活動，同一眾品牌高層見證全新電動豪華七座駕汽車登場，擁有一家五口嘅Grace，對車都好講究，又要方便又要配合小朋友，Grace話自己本身駕駛電車，既環保又舒服，呢排自己亦都揾緊合適嘅七人座駕，被問到要揾七人座駕，係咪想為屋企再添新成員？Grace就話: 「千祈唔好傻啦﹗」佢話只係有時出街，會同埋工人姐姐或老人家同行，所以只係想坐車時可以鬆動啲啫。

Grace啱啱踏入33歲，日前難得放低三個囝囝，同老公二人世界去咗雲南慶生，Grace話自從大仔出世後，都成五年多未試過兩公婆一齊旅行，所以去之前，佢都非常期待，雖然只係短短三日行程，但都留下好多美好嘅回憶，Grace仲好有創意咁製作咗一條「I」形同「E」形人去旅行嘅短片，雖然兩公婆一動一靜，但係Grace就覺得可以互補不足，而同小朋友相處方面，Grace話佢同嘉穎都唔係傳統型嘅父母，所以都希望小朋友們可以感受到嗲哋媽咪活潑嘅一面。

新一屆嘅香港小姐開始進行面試，作為師姐嘅Grace都有大方分享選美貼士，佢話最重要係要有平常心，視作係一個體驗，Grace話自己選美時太過緊張，所以未能好好享受整個選美過程，令佢至今都留有遺憾，所以佢希望小師妹，可以真正咁享受過程，呢樣先係最重要。