蕭敬騰豪包多個戶外巨型螢幕 以暱稱「阿豬瓜」賀老婆生日

蕭敬騰去年喺6.27經理人林有慧Summer生日嘅呢日，向對方求婚成功；相隔一年已經娶得美人歸嘅老蕭，再喺老婆生日送上驚喜！老蕭豪包杭州多個戶外巨型螢幕，用嚟向老婆示愛同送生日祝福！

老蕭喺Summer生日當日，同對方一齊坐七人車去睇呢份生日禮物，喺眾多螢幕入面，老蕭都以「阿豬瓜」嚟稱呼Summer，而其中一個生日螢幕更寫住：「夏天是Summer，Summer是林有慧，林有慧是阿豬瓜（小傻瓜），阿豬瓜今天生日，你永遠是我的阿豬瓜，我們永遠卡彡（抱很緊），在一起」喺車內睇到呢個螢幕嘅Summer都忍唔住大笑，仲話自己係一個專業嘅經理人，指老蕭將「阿豬瓜」呢個名咁樣公開有冇搞錯，起初老蕭仲死撐話冇人知「阿豬瓜」點解，但遭Summer無情拆穿話佢有括住解釋，老蕭聽完先表示因為買呢個廣告時要報備解釋，如果唔係唔畀通過。

老蕭將呢段片同埋用航拍喺空中影嘅生日螢幕post到社交平台，並喺帖文中表示：「祝我的阿豬瓜生日快樂。下了十幾天大雨的杭州，在這一刻瞬間轉小雨，讓我們的航拍能順利拍攝❤️」唔少網民睇完都讚老蕭浪漫，又話佢「豪」無人性呀！