《家族榮耀》結局丨佘詩曼仙氣婚紗造型勁索 林峯Chok住搶親自嘲煙霧似「火燭」

佘詩曼喺《家族榮耀之繼承者》飾演嘅晧兒，最終情歸Rio（黃浩然飾）定高浚（林峯飾），喺今晚播出嘅大結局，編劇亦採取開放式結局，以林峯疑似搶親一幕作結，當阿佘講完「我願意」嫁畀浩然之後，阿峯推門驚喜踩場，阿佘猶豫不決，不小心跌咗婚戒喺地下，到底阿佘係嫁定唔嫁，留低無限幻想空間。

阿峯超級有型嘅推門一幕，拍攝背後原來相當搞笑，為咗營造推門氣場，幕後出動煙機加大射燈，拍攝現場當推門一刻，阿峯喺煙霧瀰漫下出場，因為太大煙似足火警現場，令各人忍唔住爆笑要NG！