林鈺洧梁超怡孖眾女神性感水著錄節目 波波黃婧靈被爆為食難抵零食誘惑

余思霆、波波黃婧靈、梁超怡、陳婉衡（Alycia）、林鈺洧、王嘉慧等女神，以性感水著同周志康、周吉佩、林盛斌同金剛，喺澳門錄影遊戲節目《濠玩下水禮2024》，今次由阿Bob同金剛做隊長，帶領隊員玩水上比拼、第一次玩嘅林鈺洧同王嘉慧不知玩得幾投入，嘉慧仲唔不小心整親。

一班女神著得咁性感，事前梗係要努力Keep fit，阿Bob話開拍前，大家都要先磅重，然後再睇吓最後一日嘅磅數，睇吓邊個減得最多，不過想減磅真係唔容易，事關呢度好食好住，冇返少少定力都做唔到，好似阿Bob同阿康就大爆料，話波波最為食，完全抵擋唔到零食嘅誘惑，仲話佢做gym時偷懶，只係掛住拉筋，而身旁嘅梁超怡亦被爆做十下sit up，就走去化妝。

相反阿康就比一班女士更努力Keep fit，不停做運動為騷肌做好準備，對自己身形幾有自信，阿康更對住鏡頭大派福利。適逢錄影當日係Alycia嘅生日，大家都有為佢送上生日驚喜。