反黑英雄｜陳山聰誤被途人當真警察 張振朗角色正邪難辨變幻莫測

由鍾澍佳擔任總監製嘅新劇《反黑英雄》即將喺下周一（25號）晚上8點半喺翡翠台首播。呢日佳導聯同陳山聰、張振朗、袁偉豪、姚子羚、朱晨麗、張頴康、黃子恆、傅嘉莉、蔣家旻等出席記招，山聰同阿康更以劇中PTU造型出場。

山聰拍攝嗰陣仲真係有一位婆婆當咗佢係真警察嚟問路，又有途人以為有大事發生，前嚟向「阿Sir」問情況；阿康就預咗體能受到大考驗，但拍戲拍到嘔真係好罕見。原來係因為阿康當日拍攝嘅戲份需要跑步，而場地太大，佢要來回跑咗六次，一飲水就令佢開始嘔水。
 
劇中動作場面不斷，飾演反派嘅袁偉豪（Benjamin）同飾演警察嘅朱晨麗更係打到飛起，朱朱更形容：「今次啲賊係重量級。」蔣家旻呢次雖然係客串，不過角色非常虐心，更好考用眼神嚟做戲添！
 
反派陣容仲有子羚、子恆，以及正邪難辨嘅振朗，三人之間更會有微妙感情線，微妙到飾演一對嘅子羚同子恆喺戲中只有一場對手戲，而子羚同振朗嘅情感戲雖然多，亦未算係愛情。
 
已故藝人鄭啟泰呢次喺劇中飾演山聰同振朗嘅師父，加上山聰同佢喺現實生活係好友，回憶種種相處點滴時感觸亦好深，而好友驟逝一事，令山聰同振朗感到要活在當下。

《反黑英雄》6 月25號起 周一至五晚8點半 翡翠台播映