阿Bob遇「騙局」嚴肅拍警世片 外籍人士狂跑「朋友」即唔見錢

近年經常出Post鼓勵大家正向思維嘅 林盛斌 ，今日就奉勸大家要小心騙案，佢拍片煞有介事咁話，近日有一單「騙局」大家要非常留心，因為會有一大班人喺一片空地，被困一段時間之後，突然你就會發現自己失去部份財產咁話喎。

其實阿Bob似乎講嘅係近日正於德國舉行嘅四年一度歐洲國家杯，14號開始嘅24場賽事將一直延續到7月14號舉行嘅決賽，雖然香港同德國有6個小時時差，不過唔少球迷依然會捱夜睇波，而馬會亦受注今屆賽事，相信阿Bob亦都係因為賽果非如預期而跌入今次「騙局」喇，亦正如已故資深體育主播 伍晃榮 名句：「波係圓嘅」，少注就怡情，大家量力而為，無謂搞到焦頭爛額呀。