拉姑狄波拉帶譚輝智撐阿仔新戲首映 謝霆鋒唔呷醋兼大方合照

張學友、謝霆鋒、林嘉欣、劉雅瑟、衛詩雅、陳家樂同關智斌等出席有份主演嘅電影慈善首映禮，同場出席嘅嘉賓有歐陽震華、溫碧霞、Amanda S.，而霆鋒媽咪狄波拉仲搵埋《中年好聲音2》嘅摯愛譚輝智、顏米羔及劉威煌等一眾唱將嚟捧場。媽咪身為輝智嘅忠粉，霆鋒冇呷醋之餘，仲同輝智合照。

近日內地有報道指王菲造型越嚟越似霆鋒，霆鋒話冇留意過呢件事，身邊鬼馬嘅學友話：「咁大膽嘅你，冇留意都夠膽死。」霆鋒即補鑊解釋話唔知指邊個造型。當被追問女友似自己會否開心時？霆鋒就笑笑口：「咁就開心啦，開心喇，幾好呀!」

學友相隔14年再同霆鋒合作，感激身為武指嘅霆鋒非常遷就，令觀眾睇到學友好似好打得，霆鋒讚學友協調力同記性都好好，成個武術組都叫學友做「影印機」，因為只係講一次就已經做番晒出嚟。

學友早前感染呼吸道合胞病毒（RSV），經過休養後經已重啟巡迴演唱會，但佢話身體未完全康復，嚟梗下月生日，佢都希望可以唞吓，問到會否同家人去旅行？佢話大女出嚟做嘢，細女就會返香港，到時再睇吓！

而第四度跟學友有感情線嘅嘉欣，就投訴兩人嘅感情一直都係苦戀，不過由於佢哋已建立咗默契，所以演起上嚟係好自然。劉雅瑟雖然跟學友戲份唔多，但就發現學友喺片場有可愛一面，有時會唱歌跳舞。