StarTalk一氣呵成版丨劉威煌集猛人打造新歌 錄音八卦偶像王菲瑣事

劉威煌參加完《中年好聲音2》後，火速推出新歌《普通人》，雖然歌名叫《普通人》，但其實呢首歌嘅幕後班底一啲都唔普通，分別有澤日生作曲、林夕填詞、劉志遠編曲 同 Alvin Leong梁榮駿 做監製。呢日威煌就應 許文軒 邀請作客《StarTalk》，暢談當初點樣搵到呢個夢幻創作班底，為自己打造新歌。

同四位猛人都係首度合作嘅威煌，講境當初促成呢次合作，竟然源於一次開live，威煌表示：「有次直播時同一位朋友傾開，慢慢覺得同對方好啱傾，有次佢就問我想唔想做隻新歌，佢居然幫我聯絡到Alvin Leong。」自認係王菲迷嘅威煌，知道可以同偶像御用嘅監製合作，既開心又緊張，佢仲話自己第一次喺錄音室同對方見面時表現得非常恭敬，又向對方90度鞠躬，相當搞笑，但當熟絡咗後，威煌話自己成日都會問Alvin問關於王菲嘅事。

講到歌詞方面，威煌話當初夕爺叫佢以自己嘅文字，作一封千字文嚟講自己想講嘅故事，威煌指好多人以為佢係一個相對嚟講比較高傲、充滿自信嘅人，但自己想表達嘅係，佢同大家都係一樣。對於夕爺嘅歌詞，威煌話坦白講自己第一次睇到時覺得好深好憚，自己需要時間消化之餘，仲特別上網查過歌詞內提到嘅人名，但當佢再細心咀嚼後，發現歌詞內嘅無數細節，令佢相當感動。

威煌指自己以往都係唱Rock歌為主，但今次Alvin喺錄音時偏偏要求威煌以「淡如水」嘅方法嚟演繹，當試錄咗幾次後，Alvin就搵嚟劉志遠幫手編曲，當威煌聽到請嚟前Beyond成員為自己編曲時，佢形容呢件事係「黐線中嘅黐線」。

至於講到今次新歌嘅MV，分別有A.I. 版本同真人版本。威煌話 A.I. 版隱藏咗唔少自己嘅小秘密，當中提到關於自己嘅寵物時，威煌仲爭啲忍唔住想喊。

由《超級巨聲》去到《中年好聲音2》，威煌坦言心態有所轉變，佢表示自己而家做嘢唔會只諗結果同收穫，反而會好好享受過程，覺得盡力就已經足夠。威煌又話以前自己唔識珍惜身邊幫助自己嘅人，而家只想同共事嘅人好好享受個過程。