劉威煌開騷《中聲2》好兄弟作詩贈興 感謝隱形富豪譚輝智贊助變靚

劉威煌將於8月舉行大型演唱會，記招上佢嘅網上頻道「輕鬆啲」嘅七位好兄弟包括譚輝智、顏米羔、梁思傑、梁浩賢、王嘉明、甘永傑等拉大隊撐場，仲大騷文采，即興作詩為威煌打氣。

咪以為呢七位好兄弟一定係威煌個唱嘉賓，查實佢哋連有冇得入場都仲未知，皆因威煌並未有邀請佢哋，米羔就笑指自己一路爭取上台獻花嘅機會，希望威煌應承；而嘉明就話已經默默開始減肥，唔介意到時上台同威煌一齊除衫騷肌！

威煌呢排確實為個唱頻頻操肌，連皮膚狀況都靚咗好多，原來要歸功於輝智，事關輝智長期贊助兄弟變靚：「因為喺呢個比賽入面見到個個殘晒，我就覺得係時候要拔刀相助，尤其威煌要開演唱會就更加需要啦！雖然佢天生未去到麗質，但都ok嘅。」威煌搞笑話要多謝輝智呢位隱形富豪贊助，輝智即刻用威煌首歌話自己係「普通人」回應，兄弟唇槍舌劍非常搞笑。