星光熠熠耀保良｜中聲家族粉絲逼爆商場撐偶像 譚輝智鼓勵親戚報名《中聲3》追夢

大批《中聲》家族粉絲齊集商場，支持8月10號舉行嘅慈善節目《星光熠熠耀保良》記招，出席包括有大會司儀之一周奕瑋(Jarvis)、《中聲》唱將古淖文、顏米羔、譚輝智、羅啟豪、龍婷，仲有歌手張馳豪(Aska)、曾比特(Mike)、黃淑蔓等現身，唔少粉絲帶齊應援紙牌嚟支持偶像。

古淖文稱比賽後Fans人數的確激增，不分彼此咁支持《中聲》家族，顏米羔就相信Fans同樣會鍾意《中聲3》成員。《中聲3》開始進行全球招募，譚輝智自爆有親戚問報名資料，有意參賽，笑稱自己都得，所以好鼓勵任何人追夢。

喺日前《中聲1》演唱會上，各人均有突破，喊包三兄弟嘅太太組團「愛夫堅」演出之外，丁文俊同魏嘉信亦有爆肌演出，睇到大家嘩嘩聲，龍婷就爆羅啟豪有一身肌肉，但就收收埋埋，令羅啟豪一臉尷尬，而眾多女性喺騷上展現馬甲線，龍婷自嘲只可以買件衫嚟著。

日本通Jarvis啱啱同王敏奕去咗關西拍攝飲食節目《感動味蕾》，兩人首度合作出奇地有默契，互相合作得好開心，講到呢個美食之旅，Jarvis就走訪咗好多傳統日本美食及Omakase店，每餐將美食一掃而清。

另外，黃淑蔓近日推出咗一首Sweet爆嘅情歌，佢話首歌合適合自己23歲呢個年齡段去演繹，Mike同Aska兩位哥哥坦言對佢哋嚟講有啲唔同，Aska笑言自己年紀唔輕，要諗起初戀感覺都有啲陌生。