楊千嬅上海演唱會重現《聲生不息》經典 7月將全面休息獎勵自己

楊千嬅一連3場嘅巡迴演唱會上海站日前圓滿結束，除咗家人總動員到場撐場外，演唱會尾場更請咗周筆暢同單依純任嘉賓，喺台上重現《聲生不息》經典一幕。

巡演期間，楊千嬅嘅個人展「千木芳嬅」亦同時舉行，吸引咗唔少fans到場打卡，喺週末嘅高峰時間，仲要排成兩個鐘先可以入到場。對於今次嘅個人展，千嬅表示：「千木芳嬅個人展其實是MY TREE OF LIVE的前傳，描述一顆種子的生長；與很多人歌迷、朋友、工作伙伴一同成長和經歷，只要肯努力和堅持，每個人都可以成為一棵參天大樹。希望可以透過自己的歌發放正能量，鼓勵大家繼續一起努力過好日子。」 

而上海站嘅首場演出，千嬅先以流利嘅上海話晒恩愛：「你好，我是楊千嬅，因為丁先生家鄉在上海，我嫁過來也懂一點點上海話。」演唱會上氣氛熾熱，唱到興起嘅千嬅仲話要創下自己人生首次3小時演唱會唱40首歌嘅紀錄，之後千嬅又感性咁表示：「舞台對於歌手來說，看似很貼近，但其實也可以很遙遠，幸福不是必然的，既然我今天還有氣力，我還是可以堅持的話，每一天每一場，我都會當作是第一場和最後一場的節奏來演出，謝謝大家。」

巡唱尾場，千嬅請嚟周筆暢同單依純任嘉賓，佢哋仲重現當年《聲生不息》嘅舞台，令觀眾相當興奮。對於兩位大忙人抽時間嚟撐場，千嬅大讚佢哋有義氣，仲話佢哋當時一收到邀請後就即時答應，令佢心情非常激動，亦好感謝兩位。

剛完成了一年嘅巡唱，千嬅話要好好奬勵一下自己，7月將會全面休息去旅行，陪囝囝同家人放個開心嘅暑假。