熊家龍家齊人拍主題曲MV 樊亦敏勸何晉樂拋棄偶包

充滿愛嘅《愛‧回家之開心速遞》嚟日集齊熊家同龍家，為劇集拍攝全新主題曲《這個家》嘅MV同新片頭，睇見一班演員咁賣力嘅舞技，仲見到人群中有新面孔出現，佢就係飾演三太寶貝仔嘅何晉樂，阿Rock話好開心入《愛‧回家》劇組。樊亦敏爆料話阿Rock有同佢講拋開偶像包袱，Amy答一句：「你阿媽我拋開港姐包袱好耐啦，唔通你唔使拋低。」Amy仲話成個龍家都好靚仔，而熊家就只得劉丹一個靚仔。

一眾演員拍攝MV時都好認真，女士們仲着高跟鞋跳，所以唔使埋位時，大家都要換一換鞋唞氣，大小姐林淑敏話要拉拉筋應付激烈舞步。許家傑仲大讚二太蘇恩磁跳得好。

相反跳舞對於熊家幾位千金嚟講就冇難度，滕麗名話呢啲舞蹈完全係小事，湯盈盈仲話自己係跳得最好，呂慧儀就話曾經有一刻閃到條腰，但都無阻佢舞步。

一向率直嘅單立文，就話家人之間可以直接錫錫，仲即場錫談丹爺，點知丹爺話「細佬唔該下次剃咗鬚先錫」，楊明同豹哥佢哋一齊跳功夫舞，莊思明大讚男友跳得好，但楊明就話豹哥拍子跳得好準。