麥明詩婚後首孖老公出活動放閃 工作忙碌難實行造人大計

麥明詩 同機師老公 盛勁為 3月尾舉行一連三場婚宴之後，日前佢地首度以夫妻檔形式出席活動搵真銀。兩人襯晒衫出場，雖然影合照時一直被要求擺親蜜甫士顯得略為尷尬，不過接受訪問前就互相細心印汗，公然放閃，非常甜蜜。

兩人被問到夫妻檔工作嘅感受時，Keith就爆出一句寓工作於娛樂，感受到佢可以同太太二人世界無論係工作定玩都一樣咁享受。

郎才女貌嘅佢哋新婚三個月，大家好期待兩人快啲有愛情結晶品，Louisa坦言兩夫妻都鍾意小朋友，但因為各有各忙，加上老公成日要飛唔喺香港，成為造人大計嘅一大阻力：「我哋一路都好忙，一切都係順其自然，（有小朋友）都係一個祝福，所以一有空閒時間就會多啲相處。」

而Keith就透露一有時間喺香港都會全部俾晒太太，仲話太太係工作狂，佢唔喺香港時Louisa全心投入工作，所以有時間就會給予支持。另外Louisa就覺得榮升人妻後，亦要投放好多時間同夫家嘅屋企人相處，因為Keith家族親戚特別多，頻頻要同親戚聯誼同慶祝特別日子，令佢日程變得更忙碌。