家燕姐急召高竹莊錠欣返港 見愛徒瓣瓣掂感欣慰

Elkie莊錠欣 作客 薛家燕 主持嘅電台節目，宣傳自己首張迷你專輯。童星出身嘅Elkie曾經以韓國女團CLC成員出道，轉戰獨立發展後，暫時主力喺台灣工作。佢之前喺當地參加選秀節目，仲有唔錯成績。

早前家燕姐知道Elkie推出音樂作品，視對方如孫女嘅佢就急Call對方返港，希望Elkie可以作客電台節目兼宣傳新作，Elkie更送上香吻多謝家燕媽媽嘅關心，Elkie早喺童星年代，大約9、10歲時經已認識家燕媽媽，仲深得前輩照顧，好難忘得到對方嘅鼓勵喺演藝圈發展，佢話：「我其實第一套拍嘅劇《富貴門》就遇到家燕媽媽，當年佢當我好似孫女一樣，後來去到家燕媽媽藝術中心學藝，之後成為Honey Bees元祖成員，家燕媽媽到而家一直活躍於演藝圈嗰種熱誠，好值得我去學習。」

家燕媽媽亦大讚Elkie呢位後輩相當叻女，推出專輯一手包辦製作，親自作曲又自己搵填詞人合作，諗埋造型等方面，有幸培育到咁傑出嘅學生好有成功感。家燕媽媽亦支持Elkie回港發展:「佢演戲好，唱歌跳舞又掂，外形又靚女，瓣瓣掂，的確係不可多得嘅人才。」

Elkie不時都會翻唱經典歌拍片放上網，大家都大讚Elkie可以駕馭唔同語言嘅歌曲，而可以推出自己嘅廣東歌《沒你在旁的後來》Elkie都話係圓夢作呀！