衛詩雅宣布被求婚成功 圈外男友以巨型鑽戒抱得美人歸

對感情事一直極低調嘅衛詩雅，喺27號晚無預警下突然宣布被求婚成功！詩雅喺社交平台post出兩張相，一張係佢戴上巨型鑽戒、拖住未婚夫手嘅特寫照，而另一張就係自己被求婚時感動到雙眼通紅嘅相，並且喺帖文中表示：「日後，風雨同路。感恩遇上你❤️I Do💍」不過兩張相入面，身為男主角、詩雅嘅未婚夫就未有露面。
衛詩雅喺27號晚，無預警下突然宣布被求婚成功！
由於一直冇公開過戀情，所以當衛詩雅公布呢個重磅消息後，震驚咗唔少網民，而鄭秀文、蔡卓妍、伍允龍、Gin Lee李幸倪、陳家樂、連詩雅、何超蓮、林盛斌、洪卓立等圈中人亦有留言恭賀。
巨鑽求婚戒指！
對於被求婚成功，以及眾人嘅祝福，衛詩雅表示：「多謝大家嘅祝福，都收到好多朋友嘅祝福，好感恩。男朋友係圈外人，暫時未confirm結婚嘅日子，因為今年都仲有好多工作安排，開始為電影《破地獄》宣傳，希望有多啲時間去計劃同籌備婚禮，有好消息一定會通知大家，多謝。」
唔少圈中人都留言恭賀。
早前衛詩雅接受薛家燕電台訪問時，被對方誤認做懷孕嘅連詩雅，當時家燕姐仲恭喜衛詩雅，所以今次衛詩雅公佈喜訊後，就有網民留言表示：「家燕姐可以恭喜多次你啦🎉」、「家燕姐終於可以名正言順恭喜你喇！😂」
有網民留言洩露詩雅同未婚夫疑早已同居。
而喺眾多留言入面，亦有網民似乎一早知道衛詩雅拍拖呢個秘密，有人留言話「恭喜李生李太 👏」，當中更有位網民留言表示：「恭喜晒Michelle！ 我係之前幫你屋企處理樓上冷氣機滴水嗰位管理處同事😂 雖然我已經唔喺嗰間公司做，你都未必會記得我，但我一直幫你守住咗呢個小秘密😆 anyway, 祝你永遠幸福快樂💕」似乎衛詩雅同未婚夫一早已經同居。