家豪哥月底生日好友搶先慶祝 佘詩曼媽咪精神曬銀白短髮獻唱祝壽

金牌劇集監製 劉家豪 拍畢《逆天奇案2》後，早前宣佈榮休，月底就迎接71歲嘅家豪哥，呢日就同一眾好友預先慶祝生日，仲包括阿佘曾任DJ嘅媽媽 。而早喺5月 佘詩曼  生日嘅時候，佢就曾喺社交平台分享一張攬實戴上頭巾媽咪嘅合照，寫上「喺媽咪唔舒服嘅呢一年半，我好似又大個女咗，變得更堅強。健康當然重要，但係開心始終係第一位，淨係日日都見到媽咪呢個招牌笑容都冧哂啦～我今年嘅生日願望係：『希望大家一齊集氣，祝佘媽媽身體健康啦！』」

過往不時現身圈中人飯局或派對嘅佘媽媽，經過休養過後，又開始赴好友宴會，繼日前出前曾志偉71歲生日嘅慈善宴、葉子楣生日會。梅小青 喺社交平台分享為老公劉家豪預祝生日相片，佢寫上「踏入開心的7月，多謝好友的悉心安排，多謝三位皇阿媽和各位好友的祝福。」

當日出席好友除咗佘媽媽，仲有吳君如媽咪冬嬸同細佬吳君祥，古天樂媽咪，以及黎燕珊，見到以粉紅色披肩、長褲兼以白恤衫嘅佘媽媽精神好好，更除去頭巾，由以往招牌銀白冬姑頭髮型，換上清爽銀白短髮。獻唱祝壽歌時更加係非常落力，帶動現場氣氛。正如小青姐所講大家身體健康，開心順意每一天。