陳山聰囝囝K1畢業獲唱遊獎 四歲Jaco動靜皆宜似足老豆

視帝陳山聰近日雖然忙於拍劇以及為主演劇集《反黑英雄》宣傳，但都唔會放過任何親子時光，轉眼間四歲嘅囝囝Jaco已經步入校園就讀幼稚園，而且仲啱啱完成K1，就快放暑假喇。

陳山聰囝囝Jaco K1畢業喇！

作為24孝爸爸嘅山聰當然唔會錯過阿仔畢業嘅重要時刻，山聰7月4號喺網上分享喜悅，Po出囝囝獲獎嘅照片以及喺學校攬住Jaco嘅相片留言：「大佬好野K1結業禮仲攞埋「唱遊獎」 proud of you ，證明你真係我個仔，感恩。希望你繼續係一個健康快樂嘅地方學習同成長，並感謝每一位老師同校長。」兩父子溫情洋溢。唔少圈中好友包括姚子羚、胡蓓蔚、高海寧等睇見都留言送上祝福，更大讚Jaco叻仔又好cute。
Jaco好可愛 ！
其實連日嚟山聰都抽時間陪住Jaco，喺七月一日啱啱四歲生日嘅Jaco就獲屋企人幫佢搞咗個生日會，一家溫馨慶祝，而喺生日前席，Jaco仔又考獲台拳道黃綠帶，陪住Jaco攞獎嘅山聰，仲稱呼阿仔做大佬有感而發：「大佬人生就係靠自己努力一步一步行落去。」加上Jaco之前喺學校運動會又得過獎項，依家連唱歌都攞埋獎，相信佢得天獨厚嘅天份多少都遺傳自爸爸山聰嘅細胞，仲有平日見Jaco影相時都好識捕捉鏡頭，會自動擺出唔同嘅甫士，十足十小Model一樣，真係人仔細細觸角敏銳。
呢位小Model會唔會太可愛！？
不過翻查資料顯示，Jaco就讀嘅聖保羅堂幼稚園北角分校去年曾公開透露因受學生人口萎縮影響，營運赤字，決定2023/2024學年完結後，將北角與中環兩校合併，今年9月北角分校將會停辦。