馬德鐘拍片介紹一日工作 意外曝光超智能豪華屋企

唔少藝人都鍾意拍低自己嘅工作日常，再擺上網同fans分享。呢日馬德鐘就拍片紀錄自己一日嘅工作，不過令大家注意嘅，唔係馬神嘅工作，而係佢超智能嘅豪華屋企！

馬神嘅大門裝有人臉識別嘅智能鎖，當佢完成一日工作返到屋企時，智能鎖仲會放出馬太預先錄好嘅留言，叫佢記得要飲湯。除咗智能鎖外，馬神仲帶大家去睇佢超巨型嘅平台，佢話自己最鍾意就係完成一日嘅工作後，喺呢度享受片刻嘅寧靜，慢慢嘆返杯茶。

唔少網民睇完條片後，除咗讚馬神好型之外，大家都話佢個智能鎖超high-tech呀！