谷婭溦鼓勵學生參加中聲3追夢 期待大灣區巡演展開音樂計劃

谷婭溦(溦溦)每次推出新歌都獲得Fans嘅厚愛，落力到處為佢應援，仲會喺巴士站或者巴士車身買廣告，所以溦溦每次都好珍惜同Fans見面互動嘅機會，喺7月生日嘅佢，稍後仲會搞個生日音樂會同粉絲們好好慶祝一吓，屆時會玩遊戲互動，近距離接觸，所以溦溦呼籲鍾意聽佢嘅歌嘅歌迷可以趁機入埋歌迷會，到時一齊聚會。

溦溦之前投入擔任《中年好聲音2》紅組導師，令佢自己嘅音樂工作放慢，比賽完畢後佢終於有時間重投自己嘅音樂事業懷抱，稍後有一個大型音樂計劃，將會喺大灣區舉辦巡迴演出，令佢好期待。不過話咁快《中年好聲音3》又開始，溦溦希望自己可以將時間分配得更好。

而中聲3現正進行招募，溦溦會鼓勵身邊有潛質嘅人參加，現時已經收到好多朋友查詢，甚至自己嘅歌唱學校都有學生想參賽，溦溦呼籲唔需要考慮太多，準備好向目標進發就可以，學音樂都需要一個展示舞台，能否晉級攞獎都係其次，感受追夢經歷同過程先係最重要。