吳大強揭與范明熙密切關係 張佳添度身訂制新歌捧新人

吳大強(Bill哥哥) 張佳添 韋綺姍 同 漢洋 呢日一齊現身樂壇新人 范明熙 (小V)嘅新歌發佈會，小V喺眾前輩面前賣力獻唱新歌《隨便放閃》，作為樂壇新人嘅佢一啲都唔怯場。難怪Bill哥哥都話早已睇好呢位後輩，佢仲解釋兩人嘅密切關係，源於一位相識多年由細玩到大嘅好友，正是小V契爺，所以睇住小V長大，眼見佢唱歌又叻又靚女，大讚係有潛質新人，所以一定要嚟撐場。Bill哥哥更對小V作出加持：「加油呀，我睇好你﹗」

小V呢首新歌獲得添Sir擔任監製、作曲同編曲，完全係為佢度身訂造，小V原來係跟隨添Sir學唱歌多年嘅學生，今次有幸得到呢首作品令佢既緊張又榮幸，而歌曲主題會圍繞佢日常生活，包括一起身就會玩手機，喺社交平台Po相放閃，同時下年青人生活模式相似。

啱啱踏入樂壇，小V已有連串音樂計劃，公司又為佢搵嚟著名音樂人徐浩製作及監製新歌，小V好欣賞對方嘅名曲《記憶棉》、《到此為止》等，相當期待合作，身邊嘅Bill哥哥聽到都覺得好吸引，主動表示要同小V組成新舊組合拍檔合作。