被喻為祥師兄嘅阮兆祥,1983年就已經參加《歡樂今宵》嘅「盡顯才華SING聲星」歌唱比賽而入行,多年嚟做過主持、歌手、演員、DJ、配音員等唔同崗位,最近仲喺《福祿壽訓練學院》做導師培訓新一代演員,呢日祥師兄就嚟到 《星光路上》,同主持 潘盈慧 分享下自己喺娛樂圈嘅種種經歷。
立志做全能藝人嘅祥師兄,曾經因為人工維持唔到生活而放棄過演員夢,但搵咗份銀行工後又覺得太枯燥,所以最終都係回歸演藝圈。曾經推出過唱片,但銷量只得5、6千隻,祥師兄直認當時打擊好大,不斷反思自己輸喺咩地方,最終得出結論係自己唔夠靚仔爭減啲觀眾緣,所以祥師兄就決定去TVB試鏡嘗試其他工作。
眾所周知祥師兄扮嘢了得,除咗早前還原熱爆新聞人物何伯與新何太外,佢喺台慶扮炎明熹同對方合唱一幕亦相當爆笑,祥師兄就同大家分享返扮得成功、同自己堅持要唱得好聽嘅原因喇。
提到《福祿壽訓練學院》,祥師兄就大談佢哋喺扮嘢嘅過程遇到啲咩困難,原來佢哋最大嘅阻礙唔係化妝、髮型、服裝等,而係版權上嘅問題,亦因為咁,祥師兄就教所有學員演出需要有plan B,咁先可以應付到所有變卦。
除咗扮嘢外,祥師兄亦演出過唔少角色,當中佢首部演出嘅劇集《大頭綠衣鬥殭屍》,祥師兄就話為呢個角色加咗唔少「自己嘢」入去。對於演出《溏心風暴》,雖然係執黎耀祥二攤,但祥師兄笑言自己係𦧲飯應去應承,仲話自己喺《溏心》入面學到好多新嘢。至於講到憑舅父波呢個角色奪「最佳男配角」,祥師兄竟然以「汗顏」嘅形容呢次奪獎,又指係許紹雄同秦沛孔融讓梨畀佢呢個後輩。
雖然祥師兄對工作無所不談,但當阿盈問到佢感情事時,祥師兄即耍曬太極,仲話等阿盈下次有時間先再約佢傾呀!
![東張+ | myTV SUPER 24小時即時新聞 本地、國際時事熱話 東張+ | myTV SUPER 24小時即時新聞 本地、國際時事熱話](/tc/scoopplus/img/logo.png)
登入後即可查看我的收藏
登入後即可查看瀏覽記錄
![myTV SUPER myTV SUPER](/tc/scoopplus/img/img__header_superlogo.png)
![myTV SUPER myTV SUPER](/tc/scoopplus/img/icon__header_gosuper.png)