王菲細女李嫣女大十八變 近照曝光展現成熟冷豔氣質

王菲同第二任老公李亞鵬所生嘅囡囡李嫣，絕對可以用女大18變來形容！今年五月尾李嫣18歲生日，當時微博瘋傳兩母女合照，李嫣打扮成熟，令人驚艷。事隔個半月，李嫣又有近照流出，睇上去成熟冷豔，頗有媽咪王菲嘅風範。

李嫣轉眼已經長大成為少女，早前網上傳出佢同媽咪王菲嘅合照

相中李嫣一頭黑色長直髮，著住吊帶低胸裙，騷出事業線，而另一張相同樣係黑白色調，件衫仲開到肚臍，李嫣戴上黑超，擦晒指甲油，睇落有種歐美名模feel，網民亦紛紛留言話「挺美」、「女大十八變，李嫣真的越來越漂亮了」，亦有網民話李嫣似爸爸李亞鵬多啲，但高冷氣質就完全係王菲2.0。

李嫣雖然將社交平台嘅Post全部刪除，不過仍有唔少相片被公開

李嫣患有先天性唇顎裂（兔唇），曾經動過三次手術，王菲同李亞鵬更因此成立嫣然天使基金，幫助有同樣困擾嘅兒童。據知李嫣於2019年入讀瑞士百年貴族學校，一年學費接近百萬港幣，歐洲有唔少名人貴族都係校友。該校只招收11至18歲學生，如無意外，已滿18歲嘅李嫣應該喺今年畢業。

李嫣近年於瑞士讀書