92歲胡楓運動展魅力拍廣告 分享健康貼士最緊要多行路

現年92歲嘅胡楓(修哥)向來生活作息都好健康，所以多年來身心保持住好好嘅狀態，呢日見修哥以一個運動look上陣，仲舉住啞鈴展現活力。原來修哥係接拍一個保險品牌廣告，以推銷健康為主題。

修哥雖然年氏已高，但魄力依然，令好多人都好羨慕，經常會向佢取經詢問健康之道，修哥呢日都有分享佢嘅健康小貼士，提議大家乘坐公共交通公具早兩個站落車，又或坐升降機會早兩層出𨋢，當輕鬆做運動，多行路早已成為修哥生活習慣之一。

好似平日喺屋企睇電視時候，修哥都唔會坐定定，會不時扭動吓，而喺飲食方面就係最著重一欄，少油少鹽，有良好嘅習慣，盡量保持身體健康。不過觀眾每每見到修哥無論演戲講對白及唱歌時，都十分口齒伶俐，記憶力超強，修哥笑指呢個係冇特別秘訣，不過一直為咗搵食，所以要自己勤力做足功課，其尊業態度值得敬仰。