CoCo未曝光翻唱經典陸續推出 為母重唱偶像名曲貼心入微

亞洲天后 李玟 離世已屆一年，家屬於內地為紀念CoCo嘅雕像揭幕，而唱片公司亦發佈CoCo生前為媽媽翻唱偶像貓王嘅經典歌曲《Always On My Mind》，侍母至孝嘅CoCo，曾經喺母親節指媽媽就係自己嘅全世界，當時選曲時亦以媽媽最愛表達心聲。

《Always On My Mind》係1972年貓王同前妻Priscilla仳離之後推出，歌詞表達「失去後先知道珍惜」嘅深情遺憾。CoCo李玟演唱嘅新版本將速度放慢，傾訴佢心中滿滿嘅愛同牽掛之情，展現天后CoCo嘅演唱功力，而佢留下嘅呢首遺作，亦將長存歌迷心中。

唱片公司推出CoCo生前改編製作嘅翻唱經典

今年同時係CoCo出道30周年，自去年佢突然離世後，歌迷對佢嘅思念從未間斷，而CoCo生前已錄製完畢尚未出版嘅經典翻唱歌曲，將陸續面世並出版專輯。呢批經典歌曲由CoCo親自擔任製作人，自2016年起陸續製作，CoCo挑選咗自己同家人喜愛嘅作品，以及對當代有深刻影響嘅經典歌曲，以全新想法重新詮釋。

上月CoCo出道30周年紀念日，李氏三姊妹再次合唱嘅《When Will I See You Again》已率先推出

6月15號CoCo出道30周年紀念日，胞姐李秋林同李思林、加上李玟三姐妹合唱嘅《珍惜今天 (When Will I See You Again)》已搶先釋出，仲係繼1997年《我的翅膀》之後，李家三位姐妹再度互相支持真摯正能量合唱。

家屬早前為CoCo雕像揭幕

隨著《Always On My Mind》全球同步推出，唱片公司亦發起CoCo最美好回憶照片募集活動，獲選照片有機會出現喺之後嘅歌詞版MV，串連起對Coco嘅愛意。