Rain香港開騷跳足150分鐘 騷8舊腹肌展現最強body

香港Fans望穿秋水，終於等到韓流天王Rain啦！阿Rain相隔8年再嚟香港開騷，今年已經42歲嘅阿Rain，體態依然維持巔峰狀態，演唱會一開場就已經蠢蠢欲動想除衫咁，搞到台下粉絲不停咿嘩鬼叫。

著住紅色皮褸嘅阿Rain，一連唱出兩首歌曲《It’s Raining》同《How to Run From the Sun》，若隱若現嘅腹肌不停想出嚟見客。當阿Rain唱到首本名曲《Rainism》，終於除衫裸上身跳唱，腹肌清楚可見，最強body果然當之無愧。

查實Rain近日行程滿檔，忙開騷之餘仲要拍攝同金荷娜合作嘅新劇，佢一頭長髮就係角色造型。雖然工作忙爆，不過阿Rain完全冇欺場，成個騷跳足150分鐘，展現驚人體力，而過程中佢仲跳落台同粉絲近距離互動，令現場氣氛high爆。