AKB48 Team TP分享消暑秘訣 于馨爆公演人多而出現嘅笑料

成軍6年嘅女團AKB48 Team TP，宣佈將於8月推出第8張單曲，以及將於10月26至27日喺松山文創園區舉辦握手會。
女團AKB48 Team TP宣佈將於8月推出第8張單曲。
AKB48 Team TP嘅成員亦紛紛分享自己最近嘅生活，仲讀緊大學嘅易沄，表示自己生活相當充實，早上要去學校上課，中午就要趕高鐵去其他城市工作。同樣係大學生嘅亞恩，就話即使期中考，都係一考完就要到公司集訓，佢仲話有次期末考爭啲撞到MV拍攝日：「雖然兼顧很辛苦，但看到成果，都會覺得有盡全力真的很值得，也會偷偷跟同學宣傳新作品！」而重返校園嘅姿怡，努力考上自己想要嘅學校，佢話希望開學後，可以將演藝同課業都兼顧好。
左起：翁彤薰、劉曉晴、林于馨、林易沄。
當被問到公演時有冇咩難忘事？于馨說因為成員眾多，每次公演都會有16至18人上台演出，所以成日都會令大家唔記得呢場到底有邊幾個人冇到，佢仲話最近一次正正發生喺公司嘅集合上：「原來是點名時根本沒有算到她，也沒人搞得清楚到底誰會來誰不來，又恰好這位成員不小心遲到，所以才變成直到發車後，都沒有發現少了一個人。」
眾團員暑假檔期都被排得滿滿。
公演面臨酷暑，當講到大家嘅消暑小秘笈時，姿怡提出出門慢跑嘅「逆向操作」，令大家O晒嘴，姿怡話：「吹吹自然風、讓身體流汗很棒呀，回家再沖個澡，就不會覺得熱了！而且還不用開冷氣！健康又環保！」伊柔則分享演出前大家都一定會團訂手搖飲，仲話誇張表示手搖已經係佢哋不可或缺嘅精神食糧。彤薫就話自己係個唔怕熱嘅人：「通常成員都會準備最近很夯的涼感濕巾跟噴霧，我的話就是大膽迎暑！迎接這美好的暑夏。我是屬於心靜自然涼的人，雖然body不見得會有感覺，但內心會覺得超涼的～大家可以試試看！」伊品就話試過晒所有止汗劑、涼感噴霧、涼感濕巾、小風扇、退熱貼等都冇用：「但最近驚喜發現化妝老師的吹風機超讚，不但可以降溫還可以變回乾爽的瀏海，現在一下台就過去找老師吹吹風。」
左起：伊品、蔡亞恩、吳婉淩。
由於暑期被工作排滿檔，所以AKB48 Team TP眾人都對放假有所憧憬，曉晴話最想同團員一齊喺營火中一起仰望星空、一起烤肉聊天。于馨就話期待出國旅行放鬆一下，而俵就話最想去睇聲優演唱會，留佳則指想衝去水上樂園清涼一下。