薛家燕為愛惡補廚藝一年 阮浩棕 冼靖峰激到關楓馨眼突突

薛家燕、冼靖峰（Archie）、關楓馨（Fabienne）同阮浩棕為全新廚藝比拼節目《家常便飯爭霸戰》擔任主持，仲有廚神三姐蕭秀香做評審。家燕姐細細個入行，雖然歌精舞勁演戲好，不過到拍拖先知識得烹飪嘅重要性，見到另一半得悉自己唔識煮飯後神情失落，家燕姐都急急腳拜師學藝，足足跟「西餅皇后」李曾超羣女士學習一年，惡補廚藝。

新烹飪節目《家常便飯爭霸戰》呢日舉行記者會
 
參賽者將會透過指定食材作賽，以及自選家常菜式應戰，爭奪冠軍寶座。三姐就向大家分享貼士，揀餸最重要係諗清楚自己想食咩，有咗主題就會好開始得多。如果連想食咩都決定唔到就亂買材料。好大可能會配搭錯誤。

家燕姐當年為愛而惡補苦學廚藝
 
Archie、Fabienne、浩棕喺記招上即席示範烹飪蝦仁炒蛋，點知兩位型男手勢完全敗露，最後要三姐出手完可以完成菜式。搞到Fabienne都話：「俾兩位猛男耽誤咗。」本身五分鐘可以完成嘅菜式不但用咗九分鐘，兩位男士連落鹽都唔識，仲問係咪成兜落，Fabienne眼都突埋。

見幾位女士咁嘅面口，Archie同Nic嘅廚藝似乎都麻麻哋喇