李麗珍偕27歲女兒現身似姊妹 許倚榕爆媽咪外貌協會鍾意靚仔

李麗珍 嘅女兒 許倚榕 唔經唔覺已經27歲，雖然冇正式加入娛樂圈，但佢不時都會更新社交平台，間中仲會曬吓火辣泳裝照派福利，經常被讚遺傳自媽媽嘅好身材同甜美樣貌。而已經58歲嘅珍妹凍齡有術，呢日佢同囡囡同場現身剪綵活動時，兩母女望落十足十姊妹一樣，兩人仲分享扮靚心得，珍妹同乖女兒平日咩都會傾，就好似多咗個閨蜜一樣。

珍妹同乖女一齊出席活動，猶如兩姊妹出巡

珍妹戀愛經驗豐富，但佢就話唔使傳授戀愛攻略畀女兒，由佢自由發展，不過倚榕就大膽爆媽咪要求唔算高，睇樣靚仔就可以，係外貌協會。珍妹坦承相由心生，個樣OK應識唔會差得去邊。倚榕獲稱讚有入行條件，但佢就表示暫無意加入娛樂圈，現時主力從事幕後製作及創作相關工作，笑指自己對幕前無天份。

Annise仲笑媽咪係外貌協會，靚仔就相由心生咁話

同場亦有真正閨蜜 陳婉衡 同 簡淑兒 ，佢哋經常交流扮靚同健美心得，所以同用一位髮型師，呢日專誠嚟支持。兩姊妹平日見面或溝通都有無盡嘅生活話題，早前更一齊報瑜伽堂，互相鞭策對方一定要上堂，喺興趣上面互相影響，好多時一人活動變兩人參與。

陳婉衡同簡淑兒非常老友，成日孖公仔出現，連學運動都要一齊

專誠支持好友開張嘅 麥長青 ，近日全力發展網上平台，為了解觀眾口味都會向子女取經，從而成為溝通話題，不過麥包就發覺自己比子女幼稚，因為到現時自己都好鍾意玩玩具、模型之類，但一對仔女就對呢啲完全冇興趣。而近日阿仔由外地返港，撞正麥包同太太結婚25周年紀念，一家人計劃食好西及去旅行慶祝。
轉攻社交平台嘅麥包，將迎接結婚25周年