蕭芳芳鮮有現身狀態超好重溫40多年前舊作感觸想喊

由許鞍華執導嘅80年代嘅香港電影《撞到正》近日喺香港電影資料館放映，身為電影主演同監製嘅蕭芳芳鮮有現身，芳芳姐一頭銀曲髮，簡簡單單披上紅色圖案絲巾，神采飛揚，完美示範何謂優雅地老去。

芳芳姐當年嘅作品重映，佢特別包場同好友一齊重溫

原來呢次係芳芳姐特意包場，除咗導演許鞍華、有份演出嘅劉天蘭，著名電影人楊凡，元祖級探險家李樂詩，陳果導演以及資深傳媒人汪曼玲亦應邀一齊欣賞。汪曼玲喺社交平台分享放映會嘅合照，並貼文分享呢個難得嘅相聚其實係由楊凡促成，楊凡喺書展見到《撞到正》嘅電影介紹告之芳芳姐，跟住芳芳姐忽發奇想諗住重睇自己44年前拍攝嘅電影，於是喺楊凡嘅穿針引綫下成就呢個咁特別嘅放映會。

呢次難得共聚更係由楊凡導演促成

《撞到正》係許鞍華導演第二齣作品，係一部驚慄喜劇，片中有群鬼大鬧戲班場面，一方面呈現粵劇戲班文化，一方面講花旦間明爭暗鬥，亦有驚慄元素，電影中芳芳姐一反傳統對鬼怪毫無懼色，芳芳姐睇完電影後都有分享感受話睇番幾十年前嘅作品，心情感觸，有想喊嘅感覺。

一眾老友藉呢次機會共聚一堂