尹光80歲生日出新歌 永不言休 追上張敬軒獲頒榮譽博士殊榮

今年80歲嘅 尹光 延續上年掀起嘅光B熱潮，再接再厲喺生日正日推出新歌《命硬八十》，光哥話新歌代表自己對歌唱事業嘅堅持，「我今年80歲啦！條命都係咁硬，屹立不倒，唱到今時今日，永不言休。」光哥仲話如果大家繼續支持，佢就有信心可以繼續衝擊樂壇獎項。

光哥80歲大壽講明冇諗過退休

呢日新歌發佈會有唔少後輩前來撐場，包括江若琳、何雁詩、瑪姬、以及新歌MV導演張子丰等，而光哥嘅太太李麗儀繼續做跟得夫人，兩公婆仲大方喺鏡頭前錫錫騷恩愛。

呢日仲有大班朋友齊齊參與生日Party

光哥呢日喜上眉梢，原來佢日前得到法國大學頒發嘅榮譽博士學位，「嗰個法國大學佢話我帶咗好多歡樂俾香港市民，話我係香港嘅icon，你話icon咪icon囉！反正我就係鍾意唱啲開心歌俾大家聽。」光哥話最開心係唔需要再羨慕張敬軒，事關軒公七年前已經攞到呢個殊榮，光哥等足七年終於等到啦！

早前佢仲獲法國一所大學頒發榮譽博士學位

上年開咗一場紅館騷嘅光哥話，今年冇打算再戰紅館，反而希望可以book到文化中心，可以開一場慈善演唱會回饋社會。

Elaine同Step呢日齊齊放低囝囝來撐場，啱啱回復自由身嘅Elaine預告，好快會同老公囝囝去旅行，不過佢堅持要帶工人姐姐同行，因為佢話姐姐係湊仔嘅神隊友，而老公暫時都係豬隊友咁話喎！

何雁詩同江若琳兩位媽媽呢日都有到賀