林奕匡李靄璣愛兒出世 計畫順產驚險急開刀母子平安

恭喜恭喜！林奕匡 同太太 李靄璣 嘅愛情結晶品Darrien星期五晚已經出世，BB重2.84公斤(約6.2磅)，Phil仲親自剪臍帶。
 
原來Phil同Rikko一直打算順產，不過喺醫院待產十幾個鐘頭後開始發燒，Rikko指：「唔止我發燒，BB嘅心跳都好快，冇辦法之下要緊急轉做開刀分娩，雖然好攰，但我好驚瞓著見唔到BB，甚至瞓咗以後都唔醒。」

Phil親手為囝囝Darrien剪臍帶

Phil亦坦言同樣驚惶失措：「 我差唔多全程都陪住Rikko，希望俾多啲support佢，同埋分散佢嘅痛楚感覺，但睇住Rikko體溫不斷上升，BB心跳又不斷上升，都愈嚟愈擔心。」

Rikko臨盆時因為發燒，導致要緊急開刀分娩
 
確定開刀後，Rikko先入手術室，Phil就先辦理手續：「當時我望住醫生俾我嗰張開刀手術嘅風險資料，我突然好驚，人生從來冇試過咁驚，好驚Rikko同BB會有事，但係我知道我入到去，我一定唔可以俾Rikko知我驚，我要distract(分散)佢，於是整個playlist，全部都係我最柔和嘅歌曲俾佢聽。」

之後護士告知BB出世，雖然兩人依然緊張，不過聽到BB喊聲就齊齊鬆一口氣，Phil亦隨即為BB剪臍帶。首次同囝囝Darrien見面後，Phil流露一臉慈父笑容：「佢同我一樣咁多頭髮，眼仔碌碌就似媽媽。」

Phil認為BB眼仔似足媽咪
 
BB尚未改中文名，不過由Phil所改「Darrien」呢個英文名就非常有意思，有「Gift(恩賜)」、「Rich(豐盛)」同「Kindly(仁慈)」嘅意思，Phil話：「呢個名係對囝囝嘅祝福同期望。其實考慮咗好耐，想改一個『D』字頭嘅名，因為Rikko 嘅『R』 同 Phil 嘅『 P』都有個『D』字喺裡面。之前上網參考過過千個名都唔啱心水，最後自己諗出嚟，又幾好聽，上網check完，原來個名嘅意思又咁好，就確定用呢個啦！」

佢仲一早寫好信送俾囝囝做見面禮
 
其實Darrien出世前，Phil同Rikko早已未雨綢繆做足準備，亦遇上唔同事故，好似Phil早前打波拗柴，幸未有骨裂同影響陪伴太太。而Rikko選擇順產，更難以預知分娩時間。早前Phil往澳門演出，佢都非常擔心囝囝突然出世：「所以我離港前幾日，日日都同BB講，要等埋我返嚟先出世！結果BB好乖，真係等埋我！」

呢對新手父母仲一早買定唔同鞋仔比BB
 
懷胎良久BB終於出世，Phil同Rikko早有日夜全天候照顧嘅心理準備，Phil仲話：「心態上我哋好ready、好期待。一早安排好BB用品、衣服、傢俬等等，亦學咗點餵母乳同照顧BB，而家反而需要學習嘅就係BB將來嘅教育基金、健康保險同埋醫療保障等等。現今世代要好好養育一個小朋友真係唔容易，所以都要深思熟慮好好地安排！」
恭喜Phil同Rikko，祝Darrien快高長大