當局盼少年男女打羽毛球抗慾火 球場美女如雲隨時妒火爆炸

教育局早前推出新嘅公經社科教材，希望保護12至14歲心智未成熟嘅少年，要佢哋堅決拒絕婚前性行為，仲建議如果情到濃時㷫烚烚，可以去Book場打返場友誼羽毛球，大家純打波發乎情，止乎禮，隔住個網仲有足夠社交距離，自然唔會太過親密，少男少女唔出事就家長學校都皆大歡喜，可以跳起齊齊嗌返聲Super喇。

教育局教材嘅羽毛球發洩提議成為討論焦點
呢個話題已經引起社會各界熱議，好似係全港96個政府管理羽毛球場地，未排到你都已經夠鐘趕尾班車返屋企，定係臨時去邊搵哆啦a夢變兩支球拍出嚟都有唔少人提出過。不過ENews就發現，其實去球場隨時會遇到另一種引誘，仲可能搞到兩少無猜純純的愛鬧交收場，谷住谷住仲唔知會唔會引發到情緒低沉呀、分手冇心機讀書等問題。

見到純如白雪嘅羽毛球就諗起，未Book場今晚點算？

講緊嘅係近來最Hot Topic嘅美女運動員，好似日本羽毛球代表、近日再喺日本公開賽亮相嘅 志田千陽 ，佢社交平台追蹤數量就爆升喇，仲有曾代表香港嘅傷殘運動員 林芷煖 同埋內地影片平台睇極都有嘅羽毛球靚女，個個都球技過人又樣靚身材正，你話去到球場見到佢哋，血氣方剛嘅少男仲唔即刻舉手叫跟隊？

日本羽毛球雙打代表志田千陽
前香港殘疾羽毛球代表林芷煖

內地網紅代表小椰