馮允謙新歌MV曼谷取景 百年圖書館內拍攝挑戰跳舞

 馮允謙 十月將再踏紅館舉行第三次個唱，不過閉關前佢就飛到泰國曼谷為新歌《無理取樂》拍MV，仲邀請當地團隊合作，喺有過百年歷史嘅圖書館取景。1922年興建落成嘅圖書館氣質優雅，採用新古典主義風格，平時更嚴禁拍攝。今次Jay成功申請入內非常難得。

Jay Fung早前到泰國拍攝新歌MV
之後大隊又移師到大學校園取景，Jay話：「新歌係一首快歌，有時讀書或工作好忙、好煩惱、遇到好多狀況，呢首歌就係叫大家放低所有唔開心或者包袱，Let it go，享受呢一刻。」

導演仲安排於一間百年圖書館拍攝
而今次專程到泰國取景，原來係被大師姐鄭秀文嘅《心魔》MV啟發，佢話：「到泰國拍MV，又邀請泰國導演合作，係之前見到Sammi喺度拍嘅MV真係好出色、好靚。」

佢仲要同泰國舞者齊齊跳舞
今次仲有8位舞蹈員協助，Jay亦喺泰籍排舞師指導下跟隻手舞足蹈：「其實呢首歌係需要我有少少跳舞，Dancers跳得好好，我都有郁吓，最初有少少尷尬，導演團隊同排舞師好好，見我跳舞冇乜信心就不停歡呼打氣，令我冇咁驚。」

又未受預報嘅暴雨影響，於大學校園順利完成拍攝
為爭取時間拍攝，Jay清晨5點半就要準備，邊食早餐邊化妝，一早就到圖書館開始拍攝，黃昏時再蠹往大學校園繼續。導演原定安排晚上喺校園拍攝大型舞蹈場面，因暴雨將至改為室內進行，結果天公造美，整個拍攝都天朗氣清，直至最後一個鏡頭暴雨先降臨。

雖然日夜趕工，Jay返港前仍爭取時間品嚐地道泰國菜，仲喺機場買芒果糯米飯予孖生弟弟做手信。