音樂劇尾場獲fans排舞應援 黃劍文感動落淚變喊包

由 黃劍文 主演嘅音樂劇《為你鍾情》，一連八場嘅演出順利完成，最開心嘅當然係劍文本人啦！尤其喺尾場劍文為咗感謝kimchi Family (黃劍文歌迷會暱稱)應援，邀請所有捧場嘅Kimchi Family 影「超級大合照集」，有數百歌迷響應，佢地仲即場表演音樂劇其中一段舞，又大合唱音樂劇主題曲「盡頭重遇你」，場面非常感動。

黃劍文參演嘅8場舞台劇圓滿落幕

佢同一眾演員都百般滋咪在心頭
劍文開心表示今次係超額完成，尤其綵排長達39日，初時壓力爆煲，一度面臨崩潰邊緣，但最終靠台前幕後互相扶持渡過：「我靠導演羅松堅Lawkin 送咗一句說話『將台詞嘅每一句說話，當禮物送俾觀眾』，我先撐住呢八場表演！」

Kimman又特別感謝一眾Fans嘅支持
過去八場演出有唔少圈中好友捧場，劍文嘅好友仲讚佢「脫胎換骨」，可以轉行做跳唱歌手。而尾場劍文亦做咗喊包：「尾場唱《風再起時》大家都感動到喊，其實好多觀眾都希望有part two，團隊更希望可以將音樂劇讓香港以外嘅華人欣賞！」

大家仲希望可以再次演出，或者衝出香港到外地公演