許恩怡披媽咪柏安妮戰衣出賽 加州國際武術錦標賽勇奪四冠

昔日女神柏安妮嘅愛女；今年20歲嘅 許恩怡(Natalie)入行已經3年幾，一直係各大品牌同廣告商寵兒嘅佢，喺電影圈嘅發展亦不俗，繼2021年嘅電影《燃野少年的天空》奪得東京國際電影節「最佳新人獎」後，Natalie去年先後拍攝《但願人長久》、《爆裂點》、《贖夢》、《無名指》等多部電影，而佢其實仲係一個武林高手，近日參加一個武術錦標賽更一舉奪得四個冠軍。

Natalie形象斯斯文文，估唔到係武術高手
自細接受武術訓練嘅Natalie，近日參加「2024加州國際武術錦標賽」長拳、五步拳、24式太極同自選劍四項比賽，四個項目全部攞到冠軍，認真犀利！Natalie話自己已經好多年冇練武，今次為咗參加比賽，日日都喺屋企練習：「因為我覺得唔日日練我嘅體能唔夠好。不過我發現其實有個底好快就會pick up返，我都唔知我原來都仲記得啲動作，當要做嘅時候就出晒嚟。」
呢次參賽四個項目仲一次過橫掃各項冠軍

一次攞到四項冠軍，Natalie嘅身手絕非等閒，應該要發揮所長，進軍武打電影，「有機會我當然好想做！但係我都驚自己未夠好。」佢仲搞笑話，如果可以有靚仔做對手，就最好不過啦！
入行3年幾嘅佢，仲希望向打女之路邁進

其實Natalie今次奪冠，可能同身上套黃、白色武術服都有小小關係，原來套衫原本係媽咪柏安妮嘅戰衣，Natalie透露原本媽咪疫情前打算去新加坡參加武術比賽，因為疫情佢唔到，佢就接收咗套戰衣，有埋媽咪嘅戰力support，唔怪之得一舉奪得四冠啦！

原來佢參賽嘅戰衣係由媽媽手上繼承，難怪咁犀利啦