袁彩雲返港見老友 黃𨥈瑩激罕現身

移民加拿大十幾年嘅袁彩雲近日同老公及囡囡返港放暑假，因為疫情關係，有四年冇返香港，近日除咗接受大小傳媒訪問之外，亦把握時間同老友敘舊，日前彩雲相約咗一眾好友好似向海嵐、劉曉彤、陳彥行、陳敏之、王賢誌、車婉婉、同唐文龍以及昔日幕後同事等食飯見面。淡出娛圈多年嘅黃𨥈瑩亦鮮有露面，幾位昔日TVB小花依家變成四十路嘅美魔女，當48歲嘅袁彩雲、47歲嘅陳彥行、48歲嘅黃𨥈瑩、同55歲嘅劉曉彤一齊合照，大家同樣保養得宜令網民驚嘆。 

到底呢個組合合作過咩劇？

各人都有喺自己嘅社交平台分享靚相，記低呢次難得嘅時刻，敏之更貼文寫上「十幾二十年的友誼」，其實2020年彩雲返香港時都有相約敏之同Vinci王賢誌敘舊，彩雲同Vinci因為合作主持《週末任你點》而變成老友，當年彩雲一選完港姐獲得季軍，被安排同Vinci搭檔每個周六中午挑戰高難度直播節目，難得兩人友誼維繫至今。

黃𨥈瑩（戴帽者）激罕現身。
彩雲96年選美入行，2009年嫁俾飲食商人江銘峯，一家定居加拿大溫哥華後，佢亦淡出幕前，專心照顧囡囡，女兒經已10歲大，佢近日接受傳媒訪問時亦坦言自己都有戲癮，仲公開呼籲可以搵佢客串角色，亦話好難忘當年拍攝《妙手仁心II》同飾演佢男友唐文龍所產生嘅化學作用，當年迴響好大令佢相當有滿足感。
袁彩雲、陳彥行、黃𨥈瑩、同劉曉彤。