馮允謙拉隊曼谷拍攝新歌MV 大突破挑戰與泰國Dancers共舞

為十月個唱閉關嘅Jay馮允謙，早前佢都相當勤力去咗泰國曼谷拍攝新歌《無理取樂》嘅MV，仲搵埋當地導演團隊同舞蹈員合作，為咗配合MV中圖書館管理員嘅角色﹐團隊更難得申請到喺有過百年歷史嘅圖書館取景，之後Jay移師到一間大學校園取景，期間Jay將走廊變成T台，邊行身後不斷爆出紅色紙炮，好有氣勢。JAY專程到泰國取景，原來被同門師姐鄭秀文（Sammi）《心魔》MV啟發﹐之前見到Sammi喺度拍嘅MV真係好出色、好靚，所以要求去泰國拍攝。

Jay Fung 早前去到泰國曼谷拍攝新歌《無理取樂》MV。
Jay今次推出快歌，拍攝MV時，導演要求佢去配合舞蹈員跳舞，但一向對跳舞冇乜信心嘅Jay就喺拍攝團隊鼓勵下完成任務：「其實呢首快歌係需要我有少少跳舞，Dancers跳得好好，我都有郁吓，最初有少少尷尬，導演團隊同排舞師好好，見我跳舞冇乜信心就不停歡呼打氣，令我冇咁驚。」
導演計劃晚上喺校園空地拍攝大型舞蹈場面，但天文台預告暴雨將至，團隊擔心打算將跳舞場面改為室內進行，但Jay認為室外拍攝效果會更理想，堅持按兵不動，最後團隊整濕地面，大家喺反映霓虹燈光嘅地面上跳舞，效果相當之好。
MV中Jay Fung突破跳舞。