為見韓國神顏車銀優過千Fans逼爆商場 Do姐被冧爆「告白」險把持唔住

韓國神顏男神ASTRO成員 車銀優 日前來港出席咖啡活動，過千粉絲一早到商場排隊等睇偶像，逼爆六層樓，可見銀優嘅人氣非凡。作為星級粉絲嘅Do姐鄭裕玲亦現身，非常欣賞銀優嘅Do姐呢日作為大會司儀，依然保持佢專業嘅態度，代傳媒朋友、客戶同粉絲們向銀優問問題。

車銀優再次訪港出席飲品活動
銀優以全白西裝白馬王子Look現身，即時令全場陷入瘋狂狀態，而超級有禮嘅銀優亦360度上下環迴向在場粉絲打招呼，4月先來港開過見面會嘅銀優，一出場以廣東話同大家打招呼。
期間不斷向現場逼滿多層嘅Fans打招呼

Do姐之前有搵銀優作客佢嘅電台節目，之後印象良好，仲互相關注對方嘅社交平台成為網友，唔經唔覺有六年冇見面，Do姐仲話對方從少年變得好有男人味，不過顏值依然在線。Do姐又請銀優向在場連派三次心送福利。
活動期間仲冧到Do姐心肝卜卜跳

而喺教銀優講廣東話嘅環節，Do姐教銀優講「我最鐘意你」時意外被派福利，銀優對住Do姐講「我最鐘意你」搞到Do姐心花怒放，仲話少啲定力都把持唔住。
講起唔少粉絲前一晚已到現場霸位，銀優好多謝大家對佢熱烈嘅愛戴之餘，亦希望以好作品回饋粉絲，另外向來好鍾意工作嘅佢屬歌影視多產藝人，佢套新劇啱啱先先播完，出活動前一日銀優剛發布同挪威歌手Peder Elias嘅合作新歌《Hey Hello》，未來銀優喺芬蘭拍攝嘅韓綜亦會面世。