2024香港小姐丨馮盈盈孖師妹拉票齊騷美腿 挑戰高空降傘慶祝30歲

《2024香港小姐競選》進入最後兩星期倒數，15位候選佳麗同師姐馮盈盈一齊現身商場拉票，齊齊著上短褲大騷長腿。

呢日馮盈盈同眾佳麗呢日出席宣傳活動。

喺活動上1號陳紫佟、8號盧凱怡同10號吳芷靖獲得「現場我最喜愛佳麗」，8號盧凱怡仲開心到即場喊出來，三位同時都好驚喜，年紀最細佳麗陳紫佟多得家人同朋友拉隊到場支持成就獎項。拉票活動之外4號謝淑怡更開咗通訊群組請親朋戚友投票。

師姐盈盈企喺一眾師妹中間毫無違和感。
師姐盈盈企喺一眾師妹中間毫無違和感，一樣咁青春美麗，原來今年六月時經已踏入30歲，佢仲趁之前同師妹去塞班島拍外景嘅時候送咗樣禮物畀自己，挑戰高空跳降傘，貴為港姐冠軍級人馬嘅盈盈自爆就算面對Free Fall嘅環境，佢都要保持住港姐級儀態，努力壓制恐懼做表情管理，強調半空中並冇現醜態流口水。

盈盈用高空跳傘嚟賀30歲生日。