謝霆鋒孖內地健身達人拍片 魔怔式做鍛鍊嚇窒對方

自言好怕去健身房嘅戲霆鋒，早前為宣傳電影，就同內地健身達人花小龍合作拍咗條健身片，片中花小龍話要帶住霆鋒開啟「自律一天」，然後就帶住對方做唔同強度嘅體能鍛鍊。

花小龍帶霆鋒使鍛鍊。

最初兩人仲有講有笑，霆鋒先表示自己去年開始就有留意到花小龍，仲話睇得出對方真係有堅持，又指自己一定要食對方煮嘅午餐。之後當佢哋喺跑步機上慢跑時，花小龍問霆鋒平時係咪都有做運動嚟keep住個身形？霆鋒話都係工作時，諗動作戲練套招時嘅運動量比較多，因為自己係好怕去健身房呀跑步呀呢啲傳統訓練。

霆鋒體力好好。
霆鋒做到上癮停唔到，打敗咗花小龍。

雖然霆鋒把口就咁講，但係佢同花小龍拍拍下練練下，霆鋒就練到有啲魔怔，反過嚟唔畀花小龍停落嚟，仲勁魔鬼咁督促對方堅持住繼續衝，搞到花小龍勁無奈咁開口提醒，話佢哋只係拍片，叫霆鋒千祈唔好咁上頭，相當搞笑。

Chef Lemon品嚐花小龍炮製嘅午餐。