張家輝金髮造型展現影帝級演技 自編自導新戲再獲海外影展青睞

影帝張家輝領銜主演的電影《重生》在內地票房報捷，成為今個暑假檔最強黑馬！與此同時佢自導自演嘅新作《贖夢》亦傳來好消息，宣布入圍三大海外影展，可謂雙喜臨門。

呢個笑容令人有啲心寒。

 《重生》撼低同期多部中西猛片，首次登上內地單日票房冠軍寶座，家輝大感開心：「當然好興奮，今次能夠喺咁冷嘅票房氣氛下得到咁嘅成績，簡直可以話係殺出條血路！感謝台前幕後付出嘅努力。」家輝今次戲中角色搶鏡，形象多變，當中演毒梟狂妄私生子，一頭金髮配搭血疤造型，更獲網民大讚，加上家輝影帝級演技，成為片中最大亮點。

《贖夢》劇照。
而另一部由家輝自编自導嘅《贖夢》，自年初起獲邀參與多個海外影展，包括烏甸尼遠東電影節、韓國富川國際奇幻電影節、西班牙錫切斯國際奇幻電影節全景單元，以及馬來西亞國際電影節，皆獲得高度評價。最近又再傳來好消息，連環入圍三個歐洲影展，包括德國奇幻電影節（Fantasy Filmfest），英國曼徹斯特Grimmfest電影節（Grimmfest），以及巴黎詭奇電影節（L'Étrange Festival）競賽單元，家輝興奮表示：「  我一直都希望喺我嘅工作上可以作出多變，無論題材、角色及造型，都希望從中可以揾到創作嘅新鮮感，《重生》中扮演一個為復仇嘅亡命之徒及《贖夢》嘅精神病患者，兩個角色都能夠滿足到我演戲嘅慾望！」
張家輝呢個look驟眼睇同周星馳有啲似。
電影喺海外得到咁多讚賞，令家輝備感壓力，擔心老外鐘意，喺華人地區反而水土不服，不過相信係家輝諗多咗，好多影迷都已經急不及待想睇佢嘅新戲啦！