Aka鯨魚作畫設計陀飛輪手表 推慈善套裝助基層兒童發展

趙慧珊 近年投入作畫，唔止年初開辦個人畫展吸引唔少圈中人捧場，6月仲同與香港陀飛輪品牌合作推出腕表。Aka以擅長嘅針筆畫風格設計，日前更喺香港鐘表展2024，宣佈推出全新色系。 

Aka早前同腕表品牌合作推出主題陀飛輪

品牌負責人 沈慧林 仲大讚呢次同Aka合作非常愉美：「我參觀過Aka嘅畫展，感受到佢嘅藝術天份。而且Aka非常勤力，唔止兼顧演藝界工作，仲堅持抽時間繪畫，將嗜好發展為事業，絕對係年青人榜樣。」 而Aka就指成為腕表設計師係非常難得同難忘嘅經驗，設計時唔止想保留個人繪畫風格，亦要考慮到平衡複雜嘅機芯結構同表盤嘅吸引力。最後佢以世上最孤獨嘅鯨魚「52赫茲」為靈感，設計出陀飛輪腕表，提醒大家要學會同自己相處，由「心」出發。 

佢仲選擇以專情嘅鯨魚作為主題

Aka又話：「鯨魚象徵堅貞嘅愛情，佢哋同人類一樣實行一夫一妻制。一對鯨魚只要互相認定對方就會成為終身伴侶，生兒育女。鯨魚嘅愛情至死不渝，即使其中一方不幸離世，另一方都唔會另覓其他伴侶。」 今次佢同品牌推出慈善套裝，包含一對腕表同佢親筆繪畫嘅畫作，收益扣除成本後將全數撥捐「黃大仙青少年兒童發展基金」，為基層家庭青少年同兒童提供資源，Aka希望略盡綿力，令更多小朋友接觸繪畫的樂趣。

Aka年初再次舉行畫展，唔少藝人到欣賞佢嘅作品